عندما تتأمل حبيبتي ارى الشمس تخرج من تأملها(وجنات الشمس)

جيتني بلحظات غرگانة بسبات
اتحولت اللحظات من سكتة العرس
وچان ثوبي امشگگ وشبه الرثات
واحلى ثوب بضحكة منك ينلبس
بشعرك الماشة نجم ضوّة السكوت
وشوفت عميان هاي الماشة
والعصر ضحكات طشاهة ابهواه
لأن شافك بالحقل فراشة
باوعت ظلك لگيتة ايصب زلال
والگمر بمواج ظلك ينعكس
ضحكة رموشك جرم فجرت عزاء
خلت الليل بجمالك ينحبس
(الشمس مو وحدة تحتل السماء
وية كل صفنة الك تطلع شمس)
فوگ چفينك گمر ضيع ضواه
حاير بنورك طلع كلش حزين
وعود ايدي المستك ذاك المساء
ماعت بأيدك فرح هاي الادين
من اجيت الباب ظل صافن عليك
وكل جرح بالدار مشتاق الاديك
والله طگت روحي من گتلي تعال
آنة بس آهات گلي شلون اجيك
انتة وجه الغيم صايغلك سرير
والنجوم احلام گامت تعتنيك
الحدايق خلفت بسمك ورود
وشفت وجنات الشمس متحنية بيك
يا طفل جدا طفل گمرة وتسير
والكواكب واگفة بخلفك حرس
وحقي ما احلم وشوفك بالمنام
وانتة وجه الغبشة بعيوني انترس
والله شكلك بالوصف لاوة الحروف
تسكت الافاظ ويموت الحچي
آنة شفتك لو تعب ظلك عليك
بأحلى نسمة شوگ ظلك ينتچي
وانتة ما تدري شجرى لمن مشيت
ماتن احلامي عليك من البچي
واللسان اينوح وياه الاذان
وحتى دگات الگلب صارن مكان
بس مكان الوحشة تتكاتل عليه
بأدنى لحظة ايروح من عندة الامان
بشفتك انرسمت سلالة من الغناء
مرهم الامراضي من اتمرضت
ومن طبت گمت ورسمتك عالسماء
نگطت الحان من آني ارسمت
يالمشيتك شعر خطواتك شعور
يوگع الاحساس من رجلك نحت
انتة استاذ وتباشيرك هلال
والنظر سبورة بيه انتة كتبت
والنظر سبورة بيه انتة كتبت