قصيدة سوالف ليل

وحده إلكم...وحده ألي
ميه إلكم ...وحده ألي
كلّي ألكم....
ياهو منكم صار ألي....؟؟
......
يمعدّل منين أبديك؟؟
زغيره عليك جلماتي
دكلي منين أسولف بيك؟؟
من أول محطه الفاركاهه الريل!!
لو آخر محطه الشال منهه الليل..
من جرح الطفوله المالكاله ضماد...
لو آخر ذبح بالروح يصهل حيل
مر الليل.......
صوت الليل حسرة ناي...
تحرك جفن المتانين
وآنه هنـــــــاك
أسولف بيك...
أتاني يمطرن غيومي...ولو طيفك
ولامامش...
أكلني الليل...
رَد بيّ إلنزيف صباي
أخضّر بيك
أسيس بيك........
صينية شمع منذوره للماجاي
مرّ الروج.....
مرّ الريح...
طفيت آنه وخذتني الريح...
وإنت ولاخطف طاريك
يمعدّل منين أبديك؟!!
أنه متيه طريجي وتاه بيّ الشوف
و وحشة روحي عالسجه
منيه وخوف
تيهت الكمر وأسأل عليه بالغيم..
ومن غيوم روحي أترجه منه يهل...
ياوجه الكمر من ياكتر هليت؟؟....
أجيت منين!!!
حدّك وين....؟؟
ياأول ضوه تلكيتك من بعيد
وتبديت........
فك شبّاج حزني
ومر شمس عالغيم
تلكاني حلم مسجون...
يضحك من يمر يمه جدم سجّان...
تلكاني كبر مهجور...
محد كلّف إجدامه وتعنّه يزور...
لاشمعة زياره
ولاذجر قرآن
ولامره أعتلك عد راسي عود أبخور..
بس بيّ الطيوف جناح طير....
...يسكنّن لو لكن بستان..
وإنت الطيف
عشت وياي
مديت الكلب لمحبتك جرفين
بس ردتك تمرهن ماي
طشيت العيون بسجتك جفين
تتلكاك لو شافت خيالك جاي
تاكلني الشمس حر اعله كد الصيف
وأتكسر عليك فياي....
عرّفني أعله روحك
لاتظل مجهول.....
صوتك بلبل أخرس
طر ثنايا الروح
أسمعه وماعرف شيكول...
دليني عليك شويه خل ألكاك........!!
حيره وياك......
شكد وياك أظل أسأل
كبل عاكوله روحي وماتعرف الريح
هسه من النسيم أذبل..
صخره وماعرف كلبي النبض فد يوم
هسه من الرمش يجفل...
يل مديت روحك عسل للصبّير
حكهه شفاف روحي من العسل تخجل...
يمعدل
أخذني الليل والصفنات
((وملتني السجج وميوزة البارات))
أسولف بيك مامليت...
ومن وحشة دروبي
ومن حزن روحي
عليك بلاوعي غنيت
((جم هلال هلّن وأنت ماهليت))
لطيـــــف العــــــامري
__________________

شبّاچ عين الطفل...
مو مثل باب السجن.......
مايحبس الدمعه!!!!!!